101

101 – 可以係斑點狗，台北亦都有101，求婚都可以求101次。走入唱片店，所有精選唱片務求做到抵食夾大件，都會湊夠101隻，甚麼情歌101，鋼琴101，只要你數得出也有。101，彷彿唔單單只係代表入門初階 “one o one”，佢已經進化成一個標誌，一個代表marketing team懶到唔想再諗任何新o既 idea反正用“101”就永冇錯o既普遍現象。

我一向冇睇書ｏ既習慣，just not that into books，當然facebook除外。不過，最近突然想開始培養睇書o既習慣，當消磨時間又好，自我增值都好。走入書店，大部份best selling o既書都係 easy to read o既，而我揀o個本都唔例外，書名諷刺地叫做廣告101。

書已經買o左近兩個星期，只係睇o左53頁。

神之水滴

多得姊妹N同傳銷女王推介，終於o係上星期跟生命中第二個 Patrick Hui 見面 (另一個係我老豆)。佢除o左個樣同一輪天地之母o既解說有點滑稽之外，基本上佢講o既野同分析都有紋有路。佢話我o黎呢個世界o既使命係同別人溝通，話我尤其對住熟o既朋友會特別鍾意分享自己o既見解。佢亦講得出我做人o既理念: 只要堅持同努力就有90%機會成功。

照計應該冇人比自己更清楚自己，不過原來有陣時我地真係需要人地去話俾我地聽自己o既優點同缺點係咩，將好o既保存再發揚光大，更重要o既係將唔好o既特質改善過o黎，撥亂反正。從我所揀o既油反映出原來我做人o既問題就係有時太自我，唔太理會人地o既感受，或者咁講，係永遠顧o左自己感受先諗人地。我唔否認呢個係我o既問題，而呢個缺點亦衍生出另一個問題，就係我會expect人地諗野同我一樣，即係個腦成日出現呢句說話: “有咩理由我咁諗你會唔明?” 原來唔明就係唔明，冇得解。09年要學識站o係別人o既立場多一D。

我揀o既另一支油代表成功，搽o左之後會唔會成功當然話唔埋，就當係買支massage oil都應該冇咩蝕底。之不過天寒地凍仲要早晚乸起件衫o黎搽油都咪話唔辛苦。

順帶一提，星座同性格固然息息相關，據 Patrick所講，原來金牛座o既人都特別容易同人溝通，唔通因為人都鍾意 “金牛”? 不其然令我聯想起鄺美雲曾經被人問點解佢隻狗叫做cash時佢話 “咁人人都鍾意cash o麻” 同埋佢o係08金融海嘯下o既金句 “cash is king!”

2008 有發生過

正如不同o既電台電視台有自己o既十大金曲，朋友們也有各自o既大事回顧。既然大家都搶閘總括自己08年所發生o既大事，我冇理由唔join。我不嬲o既作風係TVB，皆大歡喜，驚喜不多但係又要有gimmick，今年決定玩另類。蜀中無大將，湊唔夠十首金曲，稱得上為 “大事”o既，今年只有兩件:

1. 由拍住拖去旅行到分手到復原到再拍拖，都只係一個多月時間，倪震周慧敏o既C1頭條我十個月前已經飲左呢啖頭啖湯。

呢個世界好多事係整定，更多o野係你預計唔到。但係今年我學到o既一樣o野就係: 我地大家擁有o既時間實在唔係想像咁多，而D時間有時係我地自己有意無意，不知不覺咁o羅o黎o徙。個天可以令一件事由有變冇，但由冇變有，好多時都係要靠自己。

好友們08年o既感情問題仍多的是，做多左做少左自己通常唔察覺，優質股可以揸住唔放，但係D死股長揸都只會係廢紙。自己今年做o左呢世人最醒o既一次投資，打算長揸唔放，係我好彩都好，我今年o係感情上o既付出同收獲的確比以前多，期望能開開心心拍個拖之餘亦開始學識點樣成熟D去處理一段關係。

未試過同自己性格咁相近o既人一齊，亦正因為咁，更容易了解對方諗緊咩。火星地球相處o係同一個關係入面需要時間心機去磨合，但係雙方目標一致o既感覺始終係甜蜜既。都係o個句: 當你想個結局係點你自然知中間條路點行，不過當中所花既時間心血同代價值唔值得，因人而異，請好好衡量。

2. Studio 83 o既誕生絕對係有計劃地o既意外懷孕，由冇變有o既另一例子。意外在於過去個三十年從未打算過有自己生意o既我忽然間o係08年決定創立自己o既事業，計劃之內o既係從來冇打算做PR做成世。我為三十歲前所得到o既事業成績而驕傲，但更值得驕傲o既應該係我有勇氣全身而退。08年o既上一半我係處於極度徬徨階段，完全失去方向，屋企人擔心，連自己都懷疑自己。幸得到身邊人支持，明白到要坐言起行，諗得到就做得到o既道理。o個一股衝勁加勇氣o既小宇宙幫我寫下人生新o既一頁。

開業至今已超過三個月，一切尚算穩定。當然，唔做過生意唔會明白生意難做，事事要親力親為已經唔算係咩成功之道，只不過係生存o既基本條件。呢兩年算係試金石，一切決定同方向仲係言之尚早，既然路一直都在，就繼續行吧!